La Bu 95

1 Hungun, Yahweh Pakai vahchoiyu te! Eihuhdoh uva Elohim Pathen ah kipah tah' in vahchoila sau te!

2 Thangvah pum in a angsung jon u hite. Avahchoina la sau te.

3 Ajeh chu Yahweh Pakai chu loupitah Pathen Elohim ahin, pathen dang chung a leng loupi ahi.

4 Mollen penle leiset laigil athuhlai abon a Aman akhut a atuhchah ahi.

5 Twikhanglen hi Ama a ahi, ajeh chu Ama sem ahi. Ama khut in leigo jonghi asem ahi.

6 Hungun, eisempau Yahweh Pakai angsungah dilsu-u hitin ama hou u te,

7 ajeh chu Ama iPathen' u ahin, eihohi aman achinjing amite ihiuvin akaihoijing akelngoihon ihiuve.

8 Yahweh Pakai in asei e, “Israelten gamthipnoi masah a abolbangu leh Meribah a alungtah bang bangun nalung tahsah hih' un.

9 Ajeh chu hilai munna chun napu napateuvin kathilbol ho chengse hi amu uvin chule eipatep' un ahi.

10 Kum somli sunga hin keima achung uva kana lunghang' in chuleh Keiman kasei in ahi, ‘amahohi keija kon a kinungheidoh mipi chu ahiuvin, keiman kasei dungjui a chon nomlou ahiuve’.

11 Hijeh chun kalunghan jehin kana kihahsellin: ‘amahohi kachol ngahna munna hunglut theilou heldiu ahi!’”