La Bu 83

1 O Elohim Pathen, thipbeh in umhih'in! Na-ngong in umhih'in. O Pathen Elohim thipsan jeng hih in.

2 Nagalmite cho leng lung khu najahlou ham? Kiletsah tah nagalmiho ahung kipatdoh khu nahet louham?

3 Amahon namite douna dingin aguh in thil agong uvin, nangin napanhu mite dounan thilphalou agong uvin ahi.

4 Amahon aseijun “Hungun hiche nam mite hi sumang uhite akitiuve, chutileh Israel hi isuhmit heldiu ahi” atiuve.

5 Hiche tohgon ahi amaho akinop to uvin nang dounan kiloikhomna khat anei taove.

6 Ama hohi Edom mite, Ishmael mite, Moab mite, Hagrit mite,

7 Gebal mite, Ammon mite, Amelek mite chuleh Philistine leh Tyre akon mipiho ahiuve.

8 Assyria miten jong ajopmun ahin, Lot chilhah hoto jong kiloikhom ahiuve.

9 Amahohi Midian, Sisera, Jabin mite Kishion vadunga nabol bang bangin boljengin.

10 Amaho chu Endor lah nasumang in chuleh atahsa'u monlha chu leiset leipha sosahnan akimang in ahi.

11 Nang in alamkai hochu Oreb le Zoab nabolna bang in sumang in lang chuleh avaipo ho chu Zebah le Zalmunna nabolna bang in thatdoh tan,

12 ajeh chu amahon hitin aseijuve, “eihon hiche Elohim Pathen gam hohi eiho phatchom na dingin lahpeh-u hite” akitiuve.

13 O Elohim Pathen amahohi huilah a changvai akithejal bangin thejaltan!

14 Meijin gammang ahal bang in chuleh meikong in molle lhang ahal lhah bang in hallha jengin,

15 Huile gon melse tah a adelmang bang in delmang'in, nakhopi huijin kichat sah in,

16 Nasatah in sujumm in O Yahweh Pakai, namin a ahung kipehlut tokah un.

17 Amaho hi tonsotna jum ding leh kicha jing dingin melsetah'in thisah tan.

18 Hiteng chuleh amahon nangbou hi Hatchungnung leiset chunga thunei chungnung nahi hi hin hetau vinte.