La Bu 52

1 Galhang nangman idia na thilse bol ho kiletsahpi nahim? Elohim Pathen thutan dihje hi tonsotna aum jing helou nahim?

2 Nilhum kei keijin nangman manthahna ding jeng na gong e. Na leigui in jong chem hemtah in mi a-at abang' in; jouthu sei in nangma nathem lheh e.

3 Nang' in thilpha sang' in thilse na deijon, thutah sangin jong jou nadeijoi.

4 Nathu jou hoa chun nangman mi suhmang ding nadei e!

5 Hinlah Elohim Pathen' in nangma na hin suhmanghel ding ahi. Aman na in' a kon a nahin kaidoh ding chuleh mihing chenna gam' a kon' a na hin bodoh ding ahi.

6 Mi chonpha hon hichu hin muvintin ahin datmo di' u ahi. Amahon hin nuisat intin aseidi' u ahi,

7 “Veuvin Elohim Pathen tahsanlou galhat ho chung' a hi ipi thil soh' a hitam? Amaho ahao nao a akisong' un, athilse bol nao a akhangtou cheh cheh un ahi.

8 Hinlah, keima vang Elohim Pathen houin sung' a keh Olive thing hing hoitah tobang kahin, keiman phat tin' a Elohim Pathen mi ngailutna long lou chu katahsan jing ding ahi.

9 O Elohim Pathen na thilpha bol jeh hin nangma thangvah jing ingting na mithengte masang' a na min ngeitah chu tahsan jing tang' e.