La Bu 48

1 Yahweh Pakai hi iti loupia hitam, ichangei a pachat dinga lom hitam, i Pathen' u Elohim chu akhopia acheng' in alhangtheng' a atou in ahi!

2 Hichehi asang' in ahoilamdang' e. Leiset pumpi' n mu ding atup un athanom cheh ui. Lhangtheng Zion molhoi hi leng thupipa chenna khopi ahi!

3 Elohim Pathen amatah chu Jerusalem indan sung' a chun acheng' in ahi Amatah hi avengbit' a pang ahi akilang doh e.

4 Vannoi mite lengho akigom' un hiche khopi dounan ahin nokhum' un ahi.

5 Ahinla amahon amuchet phat' un atangchot jeng' un atijauvin ajammang gamtauve.

6 Amaho chu tijatnan numei naonei hon hahsatna atobang' in akithingleu jeng' un ahi.

7 Ahin nang' in Tarshishte kong thupitah ho solam huijin asuhset bang' in nasuse tan ahi.

8 Keihon hiche khopi loupina chu kanajaovin tunvang Elohim Pathen hatchungnung khopi chu keiho tah' in kamuchen tauvin ahi. Hiche hi iPathen' u Elohim khopi ahi; Aman tonsot a ahoi doh ding ahi.

9 O Elohim Pathen, na houin theng sunga nangma kavahchoi lai un nami ngailut na longlou chu kagel jing ui.

10 O Elohim Pathen namin ja dia kilom tah ahibang in leiset kolmong geija vahchoiya naum ding ahi. Najet lam ban thahat chu galjona a dimset ahi.

11 Zion mol' a mipiho kipah uhen. Judah khopiho nathutan dihjeh hin kipah uhen.

12 Vo Elohim Pathen mite cheuvin Zion khopi gakholchen' un akimvel' a kijot uvin ainsangho jong gasim' un.

13 Akhopi jouse jong gachon uvin lang akulpi bang nasa tah ho jong melchih' un, chule nang hon nason nachilhah teu naseipeh thei diu ahi.

14 Ajeh chu Amahi hitobang mong Pathen ahi. Amahi tonsot tonsot geija dinga iPathen' u Elohim ahin Aman ithi tokah uva eipui hoi diu ahi.