La Bu 47

1 Mijouse hungun! Nakhut benguvin! Elohim Pathen kom a kipah tah in thangvahna sam un!

2 Ajeh chu Yahweh Pakai Hatchungnung chu gimneitah ahi. Amahi leiset chunga leng thupitah ahi.

3 Aman imasang uvah namtin vaipi hi asonkun in eidougalteo jong ikengto noi uvah eikoipeh taove.

4 Gamtep gam chu, angailut Jacob chilhahate, kithang at tah a kijot eiho lodinga alhen ahi.

5 Elohim Pathen chu gimnei tah in akal tou in, Yahweh Pakai chu sumkon gin kithong pum' in akal tou in ahi.

6 Elohim Pathen thangvah la sauvin, thangvah la sauvin; ilengpau thangvah la sauvin, thangvah la sauvin!

7 Ajeh chu Elohim Pathen hi leiset chung pumpi chunga leng ahi lasah pum' in thangvah un.

8 Elohim Pathen alaltouna theng chunga atou in namtin vaipi lah' a vai ahom' e.

9 Vannoi leiset vaihomte Abraham Pathen Elohim mitetoh atoukhom' un ahi, ajeh chu leiset chunga leng jouse hi Elohim Pathen' a ahi. Amahi vannoi leiset chung muntin a jana achang' in ahi.