La Bu 38

1 O Yahweh Pakai lung phatmo nan neilethuh hih in, nalunghan jeh in jong neijep hih in!

2 Nathal changho kasunga akikam dentan, nakhuttum in neivo lhutan ahi.

3 Neilunghan khum jeh in katahsa pumpi hi anan, kachonset naho jeh in katahsa achip soh tai.

4 Kathepmo nan eilon khum in, agihdan poh jouhoi ahitapoi.

5 Ngolhoi tah a kana chonset jehin, kamaha anasetan auidoh leotai.

6 Kathoh gimna hin ei kong konsah tai, lung gim tah in nilhum kei in kavah len ahi.

7 Khosih pi kasunga meikong bangin a allin, eidammo sahtai.

8 Keima kalhasam in kapum in kagoi lhatai. Kalungthim natna a kon in kapeng pengin ahi.

9 Yahweh Pakai nangin ipi kangai chat ham nahei, nangin ka khoisatna jouse najai.

10 Kahaina hu alhasam tan katha beitai, chule kamit in jong kho amu tapoi.

11 Kangailut chengle kagol kapaiten kahivei hi akichaovin eidalha taove. Ka insung mite jengjong achomin aumtaovin ahi.

12 Hiche jeng a jong chun kagalmi ten kathi nading thang akam nalai uve. Kaman thahna ding toh gon anei un, nilhum keijin kathi nading agong taovin ahi.

13 Hinlah ken eikigih naho jouse chu kakijah mosah in, chuleh amasang uvah apaomo bangin thipbeh in kaumtai.

14 Imacha jahlouding kanom in chuleh donbutna jong donbutlou ding kanom e.

15 Ajeh chu O Yahweh Pakai nangma ngah jinga um a kahi. Nangin kataona neidonbut tei ding ahi O Yahweh Pakai Elohim ka Pathen.

16 Keima katao in, “kadougalte noise tah in eivetsah dan, kalhuhna a jong kitaisah dan.”

17 Keima tanglouva kathohgim na-ah akichaipai ding kahitai.

18 Hinlah kachonset naho kaphong-doh in, ka nachonna ho chu kakisih behseh jenge.

19 Keiman dougal khohtah tah ho kanei e; amahon ajeh beihel in eidou ui.

20 Amahon thilpha kabol chu thilsen eilethuh un, chuleh thilpha kachepi jing jeh in eidouvun ahi.

21 O Yahweh Pakai neidalhahih in Elohim ka Pathen kei a kon in um gamla hih behin,

22 O Yahweh Pakai eihuh hingpa hungloi in lang nei kithopin.