Lampahnah 33

1 He tah Moses neh Aaron kut hmuiah amamih kah caempuei neh Egypt kho lamloh a coe uh vaengkah Israel ca rhoek kah longcaeh ni.

2 Moses loh BOEIPA olka bangla a longpueng kah a pongthohnah te a daek. He rhoek he a longpueng uh vaengkah amih kah pongthohnah ni.

3 A hla lamhmacuek dongkah hla sae hnin hlai nga dongah Raameses lamloh cet uh. Yoom vuen ah Israel ca rhoek te coe uh tih Egypt pum kah mikhmuh ah kut a thueng uh.

4 Te vaengah BOEIPA loh a ngawn Egypt te a up uh. Amih kah caming boeih neh a pathen rhoek soah BOEIPA loh tholhphu a thuung.

5 Israel ca rhoek te Raameses lamloh cet tih Sukkoth ah rhaeh uh.

6 Sukkoth lamloh cet uh tih khosoek hmoi kah Etham ah rhaeh uh.

7 Etham lamloh a caeh uh vaengah Baalzephon rhaldan kah Pihahiroth la mael uh tih Migdol rhaldan ah rhaeh uh.

8 Pihahiroth rhaldan lamloh a caeh uh vaengah tuipuei laklung ah khosoek la kat uh. Etham khosoek ah hnin thum longcaeh te cet uh tih Marah ah rhaeh uh.

9 Marah lamloh cet uh tih Elim la pawk uh. Elim ah tuiphuet tui hlai nit neh rhophoe sawmrhih om tih pahoi rhaeh uh.

10 Elim lamloh cet uh tih carhaek tuipuei ah rhaeh uh.

11 Carhaek tuipuei lamloh cet uh tih Sin khosoek ah rhaeh uh.

12 Sin khosoek lamloh cet uh tih Dophkah ah rhaeh uh.

13 Dophkah lamloh cet uh tih Alush ah rhaeh uh.

14 Alush lamloh cet uh tih Rephidim ah rhaeh uh. Tedae teah te pilnam kah a ok ham tui om pawh.

15 Rephidim lamloh cet uh tih Sinai khosoek ah rhaeh uh.

16 Sinai khosoek lamloh cet uh tih Kiborthhattaavah ah rhaeh uh.

17 Kiborthhattaavah lamloh cet uh tih Hazeroth ah rhaeh uh.

18 Hazeroth lamloh cet uh tih Rithmah ah rhaeh uh.

19 Rithmah lamloh cet uh tih Rimmonperez la rhaeh uh.

20 Rimmonperez lamloh cet uh tih Libnah ah rhaeh uh.

21 Libnah lamloh cet uh tih Rissah ah rhaeh uh.

22 Rissah lamloh cet uh tih Kehelathah ah rhaeh uh.

23 Kehelathah lamloh cet uh tih Shepher tlang ah rhaeh uh.

24 Shepher tlang lamloh cet uh tih Haradah ah rhaeh uh.

25 Haradah lamloh cet uh tih Makheloth ah rhaeh uh.

26 Makheloth lamloh puen uh tih Tahath ah rhaeh uh.

27 Tahath lamloh cet uh tih Terah ah rhaeh uh.

28 Terah lamloh cet uh tih Mithkah ah rhaeh uh.

29 Mithkah lamloh cet uh tih Hashmonah ah rhaeh uh.

30 Hashmonah lamloh cet uh tih Moserah ah rhaeh uh.

31 Moserah lamloh cet uh tih Benejaakan ah rhaeh uh.

32 Benejaakan lamloh cet uh tih Horhagidgad ah rhaeh uh.

33 Horhagidgad lamloh cet uh tih Jobathah ah rhaeh uh.

34 Jobathah lamloh puen uh tih Abronah ah rhaeh uh.

35 Abronah lamloh puen uh tih Eziongeber ah rhaeh uh.

36 Eziongeber lamloh cet uh tih Kadesh kah Zin khosoek ah rhaeh uh.

37 Kadesh lamloh cet uh tih Edom khohmuen bawt kah Hor tlang ah rhaeh uh.

38 Hor tlang ah tah khosoih Aaron khaw BOEIPA kah olka bangla cet coeng tih Egypt kho lamloh Israel ca rhoek a coe uh phoeikah kum likip, hla nga, hlasae cuek vaengah pahoi duek.

39 Aaron he a kum ya pakul pathum a lo ca vaengah Hor tlang ah duek.

40 Te vaengah Kanaan khohmuen ah Israel ca rhoek a pawk te tuithim kah kho aka sa Arad manghai Kanaan loh a yaak.

41 Hor tlang lamloh puen uh tih Zalmonah ah rhaeh uh.

42 Zalmonah lamloh puen uh tih Punon ah rhaeh uh.

43 Punon lamloh puen uh tih Oboth ah rhaeh uh.

44 Oboth lamloh puen uh tih Moab khorhi kah Ijeabarim ah rhaeh uh.

45 Iyim lamloh puen uh tih Gad Dibon ah rhaeh uh.

46 Gad Dibon lamloh puen uh tih Almondiblathaim ah rhaeh uh.

47 Almondiblathaim lamloh puen uh tih Nebo rhaldan kah Abarim tlang ah rhaeh uh.

48 Abarim tlang lamloh puen uh tih Jerikho Jordan kah lo Moab kolken ah rhaeh uh.

49 Jordan kah Moab kolken ah te Bethjeshimoth lamloh Abelshittim duela rhaeh uh.

50 Jerikho Jordan kah Moab kolken ah BOEIPA loh Moses te a voek tih,

51 “Israel ca rhoek te voek lamtah amih te thui pah. Nangmih Kanaan khohmuen la Jordan te kat uh.

52 Te vaengah khohmuen kah khosa boeih te na mikhmuh lamloh haek uh. Amih kah ngaihlihnah cungkuem te thup uh lamtah a mueihlawn mueihlip boeih te khaw thup uh. Amih kah hmuensang boeih te khaw tulh uh.

53 Khohmuen te pang uh lamtah a khuiah khosa uh. Khohmuen te pang hamla nangmih taengah kam paek coeng.

54 Khohmuen te hmulung neh tael uh. Nangmih kah koca aka ping ham tah a rho te kum sak lamtah a sii ham tah a rho te sih pah. Amah ham hmulung dongah a naan te tah anih ham om pawn vetih na pa rhoek kah koca tarhing ah pang uh.

55 Khohmuen kah khosa rhoek te na mikhmuh lamloh na haek uh pawt atah amih lamkah na sueng sak uh te nangmih mik ah miktlaeh banlga, nangmih kaep ah tlaeh la om ni. A khuikah kho na sak nah khohmuen ah nangmih te n'daengdaeh uh ni.

56 Amih taengah saii ham ka cai vanbangla nangmih taengah khaw ka saii ni,” a ti nah.