Joba 19

1 Job loh a doo tih,

2 Me hil nim ka hinglu na pae sak vetih ol neh kai nan phop uh ve?

3 Voei rha ka hmai na thae sak uh coeng, kai nan toeh te na yak pawh.

4 Ka taengah ka tholh a rhaeh pueng dongah ka palang tueng pataeng ngawn.

5 Kai soah na pantai mai tih kai kokhahnah bangla kai taengah na tluung tueng pai.

6 Pathen loh kai n'khun sak tih amah kah tluum te ka kaepvai ah a vael.

7 Kuthlahnah te ka doek tih bomah ka bih cakhaw n'doo pawt dongah tiktamnah om pawh.

8 Ka caehlong he a biing tih ka muk tloel. Ka hawn ah a hmuep a khueh.

9 Kai kah thangpomnah te kai dong lamloh a pit tih ka lu dongkah rhuisam khaw a dul.

10 Kai kaepvai lamloh m'palet tih ka pongpa vaengah ka ngaiuepnah he thing bangla a puen.

11 A thintoek he kai taengah a sai vaengah kai he amah taengah a rhal bangla m'moeh.

12 Anih kah caem te rhenten ha pawk uh tih a longpuei te kai m'picai thil uh. Te phoeiah ka dap ah pin rhaeh uh.

13 Ka manuca rhoek kai taeng lamloh lakhla coeng tih ka ming rhoek khaw kai lamloh kholong uh coeng.

14 Ka yoei uh rhoek loh n'toeng uh tih ka ming uh rhoek loh kai n'hnilh uh coeng.

15 Ka im pah neh ka salnu rhoek loh kholong bangla kai m'poek uh. Amih mikhmuh ah kholong hlang la ka om.

16 Ka sal te ka khue dae oei pawh. Anih te ka ka neh ka hloep.

17 Ka mueihla he ka yuu taengah a kholong pah tih ka bungko kah ka ca rhoek taengah khaw rhennah ka bih.

18 Casenca rhoek long pataeng kai he n'hnaep uh tih, ka thoh vaengah kai he n'thui uh coeng.

19 Ka baecenol dongkah hlang boeih loh kai n'tuei uh tih ka lungnah he kamah taengah poehlip uh.

20 Ka vin neh ka saa hil khaw ka rhuh dongla kap tih ka no dongkah nohli neh ka loeih.

21 Ka hui rhoek nangmih loh kai n'rhen uh, kai n'rhen uh. Pathen kut loh kai he m'ben coeng.

22 Balae tih Pathen bangla kai nan hloem uh. Kai saa lamkah khaw na hah uh hae mahpawh.

23 Kai ol a daek uh te unim a paek bal. Cabu dongkah bangla a unim a paek vetih a taem uh ve?

24 Thi cacung neh kawnlawk te lungpang dongah a yoeyah la a dae uh.

25 Kai tah kai aka tlan te hing tih hmailong kah laipi dongah thoo ni tila ka ming.

26 Ka vin hnukah he hluep uh cakhaw, ka saa dongah Pathen ka hmuh bitni.

27 Kai kamah long khaw ka hmuh vetih ka mik long khaw a hmuh pueng ni. Te dongah ka rhang kah ka kuel loh rhalawt te a hue moenih.

28 Ka khuikah ol hnun a hmuh parhi te, “Anih te metlam n'hloem eh?” na ti uh akhaw,

29 nangmih te cunghang hmai ah bakuep uh laeh. Amah dumlai tah dumlai bangla na ming uh hamla cunghang lamlothaesainah kosi om coeng,” a ti.