Tingtoeng 76

1 [Rhotoeng neh aka mawt ham, Asaph kah Tingtoeng laa] Judah khui loh a ming Pathen te Israel khuiah khaw a ming tanglue.

2 Te dongah a po te Salem ah om tih, a khuisaek tah Zion ah om.

3 Teah te liva hmaino khaw, photling khaw, cunghang khaw, caemtloek khaw Boeipa loh a phaek. (Selah)

4 Na khosae khaw maeh kah tlang boeih lakah khuet ngai.

5 Lungbuei aka lueng khaw a buem uh. Tedae a mikku neh a ih uh dongah hlang tatthai boeih loh a kut thueng uh thai pawh.

6 Jakob Pathen namah kah tluungnah dongah leng khaw, marhang khaw ip sut.

7 Nang, namah rhoe he a rhih om tih na thintoek vaengah nang hmai la unim aka pai thai eh?

8 Dumlai khaw vaan lamkah na yaak sak vaengah diklai loh a rhih tih mong.

9 Pathen aw laitloeknah ham neh diklai kodo boeih khang ham na thoh vaengah. (Selah)

10 Hlang kah kosi long pataeng nang uem tih kosi a meet loh nang m'ven.

11 Na Pathen BOEIPA taengah caeng lamtah thuung lah. A kaepvai boeih loh rhimomnah taengah kutdoe khuen uh saeh.

12 Rhaengsang rhoek kah a hil khaw a lol sak tih diklai manghai rhoek loh a rhih uh.