Joba 23

1 Job loh a doo tih,

2 Tihnin ah khaw boekoek bangla ka kohuetnah loh ka kut he ka hueinah neh a nan.

3 U loh n'khueh khaw ka ming vetih amah te ka hmuh phoeiah amah kah hmuenmol la ka pha lah mako?

4 A mikhmuh ah laitloeknah ka khueng lah vetih ka ka ah toelthamnah ka paem lah mako.

5 Olthui te ka ming tih kai n'doo vaengkah kai hamla a thui te ka yakming lah mako.

6 Thadueng cungkuem neh kai n'ho saeh a? Amah loh kai taengah khueh het mahpawt a?

7 Aka thuem te a hmaiah a tluung pahoi lah vetih, kai he laitloek khui lamloh a yoeyah la ka loeih mako.

8 Khothoeng la ka caeh mai akhaw amah a om moenih. A hnuk ah khaw anih te ka yakming moenih.

9 Banvoei ah a saii vaengah ka hmuh moenih. Bantang la a mael vaengah ka hmuh moenih.

10 Tedae longpuei a ming dongah kai he ka taengah n'noemcai tih sui bangla ka thoeng.

11 A khokan te ka khopha loh a vai. A longpuei te ka ngaithuen tih ka phael moenih.

12 A hmuilai kah olpaek khaw ka hlong pawt tih ka buhvae lakah a ka lamkah ol ni ka khoem.

13 Tedae amah tah pakhat la om tih, ulong anih a mael thil thai? Te dongah a hinglu kah a ngaih bangla a saii.

14 Ka oltlueh te a thuung tih te bang te amah taengah yet.

15 Te dongah a mikhmuh lamloh ka let coeng. Ka yakming dongah amah te ka rhih.

16 Pathen loh kai lungbuei a phoena sak tih tlungthang loh kai n'let sak.

17 Tedae a hmuep kah maelhmai loh m'biit pawt tih ka maelhmai te a khohmuep loh a dah moenih.