< Nambar 33 >
1 Mosi hoi Aaron zaehhoihaih rang hoiah, Israel kaminawk Izip prae thung hoi tacawt o moe, kholong caehhaih kawng,
2 Angraeng mah thuih ih lok baktih toengah, Mosi mah kholong caehhaih kawng tarik ih ca loe hae tiah oh.
3 Israel kaminawk loe khrah tangsuek, ni hatlai pangato naah, Ramese vangpui hoiah tacawt o; Israel kaminawk loe misong loihaih ni boeng pacoeng, akhawnbang ah Izip kaminawk mikhnuk ah amoekhaih hoiah tacawt o.
4 To nathuem ah Izip kaminawk loe, Angraeng mah hum pae ih a calunawk ih qok to aphum o; nihcae ih sithawnawk doeh Angraeng mah lokcaek pae.
5 Israel kaminawk loe Ramese vangpui hoiah tacawt o moe, Sukkoth ahmuen ah atai o.
6 Sukkoth ahmuen hoiah tacawt o moe, praezaek ramri ah kaom Etham ahmuen ah atai o.
7 Etham ahmuen hoiah tacawt o moe, Baal-Zephon hma ah kaom, Pi-Hahiroth vangpui ah amlaem o let; to pacoengah Migdol vangpui hma ah atai o.
8 Pi-Hahiroth vangpui hoiah tacawt o moe, tuipui um hoi praezaek ah caeh o poe; Etham praezaek ah ni thumto thung caeh o pacoengah, Marah ahmuen ah atai o.
9 Marah ahmuen hoiah tacawt o moe, Elim avang ah caeh o; Elim avang ah loe tuipuek hatlai hnetto hoi ungsikung qui sarihto ohhaih ahmuen ah atai o.
10 Elim hoiah tacawt o moe, tuipui kathim taengah atai o.
11 Tuipui kathim hoiah tacawt o moe, Sin praezaek ah atai o.
12 Sin praezaek hoiah tacawt o moe, Dophkah ah atai o.
13 Dophkah hoiah amsak o moe, Alush ah atai o.
14 Alush hoiah amsak o moe, Rephidim ah atai o; to ahmuen ah loe kaminawk mah naek han koi tui to om ai.
15 Rephidim hoiah amsak o moe, Sinai praezaek ah atai o.
16 Sinai praezaek hoiah amsak o moe, Kibroth-Hattaavah ahmuen ah atai o.
17 Kibroth Hattaavah hoiah amsak o moe, Hazeroth ahmuen ah atai o.
18 Hazeroth hoiah amsak o moe, Rithmah ahmuen ah atai o.
19 Rithmah hoiah amsak o moe, Rimmon-Perez ah atai o.
20 Rimmon-Perez hoiah amsak o moe, Libnah avang ah atai o.
21 Libnah avang hoiah amsak o moe, Rissah ahmuen ah atai o.
22 Rissah hoiah amsak o moe, Kehelathah ahmuen ah atai o.
23 Kehelathah hoiah amsak o moe, Shepher mae ah atai o.
24 Shepher mae hoiah amsak o moe, Haradah ahmuen ah atai o.
25 Haradah hoiah amsak o moe, Makheloth ahmuen ah atai o.
26 Makheloth hoiah amsak o moe, Tahath ahmuen ah atai o.
27 Tahath hoiah amsak o moe, Terah ahmuen ah atai o.
28 Terah hoiah amsak o moe, Mithkah ahmuen ah atai o.
29 Mithkah hoiah amsak o moe, Hashmonah ahmuen ah atai o.
30 Hashmonah hoiah amsak o moe, Moseroth ahmuen ah atai o.
31 Moseroth hoiah amsak o moe, Ben-Jaakan ahmuen ah atai o.
32 Bene-Jaakan hoiah amsak o moe, Hor-Haggidgad ahmuen ah atai o.
33 Hor-Haggidgad hoiah amsak o moe, Jotbathah ahmuen ah atai o.
34 Jotbathah hoiah amsak o moe, Abronah ahmuen ah atai o.
35 Abronah hoiah amsak o moe, Ezion-Geber ahmuen ah atai o.
36 Ezion-Geber hoiah amsak o moe, Zin praezaek ah kaom Kadesh ahmuen ah atai o.
37 Kadesh hoiah amsak o moe, Edom ramri ah kaom, Hor mae ah atai o.
38 Angraeng mah paek ih lok baktih toengah, Israel kaminawk loe Izip prae thung hoiah tacawt o pacoeng, saning qui pali, khrah pangato haih, ni tangsuek naah, qaima Aaron loe Hor mae ah dawh tahang moe, to mae ah duek.
39 Hor mae ah duek naah Aaron loe saning cumvai pumphaeto pacoeng, thumto oh boeh.
40 Kanaan prae aloih bangah kaom siangpahrang Arad mah, Israel kaminawk angzoh o ti, tiah a thaih.
41 To pongah Israelnawk loe Hor mae hoiah amsak o moe, Zalmonah ahmuen ah atai o.
42 Zalmonah hoiah amsak o moe, Punon hmuen ah atai o.
43 Punon hoiah amsak o moe, Oboth hmuen ah atai o.
44 Oboth hoiah amsak o moe, Moab ramri ah kaom, Iye-Abarim hmuen ah atai o.
45 Iye-Abarim hoiah amsak o moe, Dibon-Gad hmuen ah atai o.
46 Dibon-Gad hoiah amsak o moe, Almon-Diblathaim ahmuen ah atai o.
47 Almon-Diblathaim hoiah amsak o moe, Nebo hma ah kaom, Abarim mae taengah atai o.
48 Abarim mae hoiah amsak o moe, Jeriko vangpui taeng, Jordan vapui yaeh ih Moab azawn ah atai o.
49 Moab azawn hoiah Jordan vapui taeng, Beth-Jeshimon vangpui hoi Abel-Shittim vangpui khoek to atai o.
50 Jeriko vangpui maeto bang, Jordan vapui taengah kaom, Moab azawn ah oh o naah, Angraeng mah Mosi khaeah,
51 Israel kaminawk khaeah hae tiah thui paeh; Jordan vapui to nang kat o moe, Kanaan prae thungah na kun o naah,
52 nangcae hma ah kaom prae kaminawk to haek oh; a sak o ih krangnawk hoi atui pakaw moe, pahlom ih krangnawk to phrae pae o ah loe, nihcae ih hmuensangnawk doeh phrae pae o boih ah.
53 To prae to nangcae han kang paek boeh pongah, to prae kaminawk to haek oh loe, a thungah om oh.
54 Prae loe imthung takoh maeto boih hanah, taham khethaih phoisa vahhaih hoiah pazet ah; kapop kue imthung takohnawk hanah kalen kue ah prae to paek ah loe, imthung takoh tamsi kue kaminawk hanah loe kathoeng kue prae to paek ah; taham khethaih phoisa vahhaih moe, amtimhaih ahmuen to nihcae mah toep han ih qawk ah om tih; acaeng maeto pacoeng maeto, to tiah qawk to toep o tih.
55 Toe nangcae hma ah kaom prae kaminawk to na haek o ai nahaeloe, na pathlung o ih kaminawk loe nangcae ih miknuen ah om o ueloe, nangcae ih panak hanah soekhring ah om o tih; na oh o han koi prae thungah nihcae mah raihaih na paek o tih.
56 To naah nihcae nuiah sak han ka tim ih hmuen to nangcae nuiah ka sak lat han, tiah a thuih, tiah thui paeh, tiah a naa.
