Daidase 3

1 Dia fi dunu da ouligisu dunu amola gamane ouligisu dunu, amo noga: le nabima: ne sia: ma. Ilia da eso huluane hou ida: iwane fawane hamomusa: momagele ouesaloma: ne sia: ma.

2 Ilia da eno dunu ilia hou baligidu mae sia: ne, olofosu hou, na: iyado hou amola dunu enoma gebewane hou hamoma: ne, ilima sia: ma.

3 Bai ninia amola da musa: gagaoui agoane, hame nabasu amola wadela: i hou hamosu. Ninia da musa: ninia hanai hou amola wadela: i hedesu hou hamosu. Eso huluane ninia da eno dunuma higasu amola mudasu hamosu. Ninia da eno dunuma ha lai amola ilia bu dabe ninima ha lai.

4 Be Gode ninia Gaga: su amo ea asigidafa hou ninima olelebeba: le,

5 E da nini gaga: i dagoi. Ninia da hou ida: iwane hamoiba: le hame. Be E da gogolema: ne olofosu dawa: beba: le, nini gaga: i dagoi. E da Ea A: silibu Hadigidafa Gala (amo da ninia dogo dodofele, ninima gaheabolo lalelegesu amola gaheabolo esalusu iaha) amoga Gode nini gaga: i.

6 Yesu Gelesu ninia Gaga: su da hamobeba: le, Gode da Ea A: silibu Hadigidafa Gala ninia dogo ganodini aligila sa: ima: ne, ninima i.

7 Gode da nini afadenei bu ida: iwane hamoi amola ninia hanai liligi, amo da eso huluane mae bogole Fifi Ahoanusu amola Ea hahawane iasu, amo huluane dawa: ma: ne, Gode da Ea A: silibu ninima i dagoi. (aiōnios g166)

8 Amo sia: da dafawane sia: ! Amola di amo sia: noga: le dawa: digili olelema! Bai Gode Ea hou lalegagui dunu ilia eso huluane hou ida: iwane, dunu huluanema fidisu hou hamomu da defea.

9 Be udigili gagaoui sia: ga gegesu, aowalali ilia dio amoma hogosu hou amola sema sia: dawa: beba: le gegesu hou, amo huluane yolema. Amo hou da houdafa hame fidisa.

10 Dunu da afafasu hou hamosea, di ema afadafa fawane hame be aduna o aduna baligili gagabole sia: ma. Amasea, e da afafasu hou hame yolesisia, amo dunuma bu mae gilisima.

11 Agoaiwane dunu da wadela: idafa di dawa: Ea wadela: i hawa: hamosu da ea wadela: i hou olelesa.

12 Na da Adimase amola Digigase, dima asunasimu. Ela dima doaga: sea, na da Naigobolise moilaiga anegagi oubi huluane amoga esalumusa: dawa: i dagoiba: le, di da amo moilaiga misa: ne, logo hogoi helema.

13 Fofada: su ouligisu dunu ea dio amo Sinase amola Abolose, ela da soge enoga masusa: dawa: beba: le, dia ela fidima. Ilia esaloma: ne liligi defele lama: ne, di fidima.

14 Ninia fi dunu da udigili hamedei liligi yolesili, dunu eno ilia dafawane esaloma: ne liligi defele amo lama: ne, eso huluane fidisu hawa: ida: iwane hamomu da defea. Ilia udigili esalumu da defea hame.

15 Na na: iyado dunu huluane guiguda: gilisi da dima asigi sia: adosisa. Dia nini na: iyado dunu Yesu Ea dafawaneyale dawa: su hou amo ganodini esala dunu, amo huluanema ninia asigi sia: adosima. Gode Ea hahawane dogolegele iasu hou dili huluanema dialoma: ne ninia dawa: lala. Sia: Ama Dagoi