< Amahubo 83 >

1 Nkulunkulu, ungazithuleli; ungathuli, ungathi zwi, Nkulunkulu.
Ingoma. Ihubo lika-Asafi. Oh Nkulunkulu, ungathuli uthi zwi; ungangincitshi indlebe yakho, ungameli khatshana lami, Oh Nkulunkulu.
2 Ngoba, khangela, izitha zakho ziyaxokozela, labakuzondayo baphakamise ikhanda.
Akubone ukuthi ziphithizela kanjani izitha zakho, ukuthi ziwaqaphisa kanganani amakhanda azo.
3 Benzela abantu bakho iseluleko sobuqili, bacebisana bemelene labafihliweyo bakho.
Ngobuqili zakhela abantu bakho amacebo; zisongela labo obathembileyo.
4 Bathi: Wozani, sibaqume, bangabi yisizwe, lebizo likaIsrayeli lingabe lisakhunjulwa.
Bathi, “Wozani kasibabhuqe du njengesizwe, ukuze ibizo lika-Israyeli lingaphindi likhunjulwe.”
5 Ngoba bacebisana nganhliziyonye, benza isivumelwano esimelana lawe;
Nganhliziyonye bawakha amacebo ndawonye; bayahlangana beme ndawonye ukumelana lawe,
6 amathente eEdoma, lamaIshmayeli; iMowabi, lamaHagari;
amathente ase-Edomi lama-Ishumayeli, awamaMowabi lawamaHagari,
7 iGebali, leAmoni, leAmaleki; amaFilisti kanye labahlali beTire;
amaGebhali, lama-Amoni lama-Amaleki, amaFilistiya labantu beThire.
8 iAshuri layo isizihlanganise labo; bebeyingalo ebantwaneni bakaLothi. (Sela)
Lama-Asiriya asebambene labo ukuqinisa izizukulwane zikaLothi.
9 Yenza kubo njengeMidiyani, njengoSisera, njengoJabini, esifuleni iKishoni.
Yenza kubo njengoba wenza eMidiyani, njengowakwenza kuSisera loJabhini emfuleni iKhishoni,
10 Babhubhela eEndori, baba ngumquba womhlabathi.
ababhubha e-Endo baba njengezibi emhlabathini.
11 Yenza zona izikhulu zabo zibe njengoOrebi lanjengoZebi, lawo wonke amakhosana abo abe njengoZeba lanjengoZalimuna,
Yenza izikhulu zabo zibe njengo-Orebhi loZebhi, wonke amakhosana abo abe njengoZebha loZalimuna,
12 abathi: Kasizithathele amadlelo kaNkulunkulu abe ngawethu.
abathi, “Kasiwathumbe amadlelo kaNkulunkulu.”
13 Nkulunkulu wami, benze babe njengokuhwithwayo, njengamakhoba phambi komoya,
Benze babe njengenkunkuma, Oh Nkulunkulu wami, njengamakhoba ephetshulwa ngumoya.
14 njengomlilo utshisa ihlathi, lanjengelangabi lithungela izintaba.
Njengalokhu umlilo uhangula igusu kumbe ilangabi lilumathisa izintaba,
15 Ngokunjalo baxotshe ngesivunguzane sakho, ubethuse ngesiphepho sakho.
kanjalo basukele ngesivunguvungu sakho ubethuse ngesiphepho sakho.
16 Gcwalisa ubuso babo ngehlazo, ukuze balidinge ibizo lakho, Nkosi.
Bahuqe ubuso babo ngehlazo ukuze abantu balidinge ibizo lakho, Oh Thixo.
17 Kababe lenhloni bethuke kuze kube nininini, yebo, badunyazwe babhubhe.
Sengathi bangayangeka lanini badunyazwe; kungathi bangafa belehlazo.
18 Ukuze bazi ukuthi nguwe wedwa, obizo lakho nguJehova, oPhezukonke emhlabeni wonke.
Yenza bakwazi ukuthi wena, obizo lakho unguThixo ukuthi wena wedwa ungoPhezukonke emhlabeni wonke.

< Amahubo 83 >