Ii Samuelis 22
1 locutus est autem David Domino verba carminis huius in die qua liberavit eum Dominus de manu omnium inimicorum suorum et de manu Saul
Locutus est autem David Domino verba carminis huius, in die qua liberavit eum Dominus de manu omnium inimicorum suorum, et de manu Saul.
2 et ait Dominus petra mea et robur meum et salvator meus
et ait: Dominus petra mea, et robur meum, et salvator meus.
3 Deus meus fortis meus sperabo in eum scutum meum et cornu salutis meae elevator meus et refugium meum salvator meus de iniquitate liberabis me
Deus fortis meus sperabo in eum: scutum meum, et cornu salutis meae: elevator meus, et refugium meum: salvator meus, de iniquitate liberabis me.
4 laudabilem invocabo Dominum et ab inimicis meis salvus ero
Laudabilem invocabo Dominum: et ab inimicis meis salvus ero.
5 quia circumdederunt me contritiones mortis torrentes Belial terruerunt me
Quia circumdederunt me contritiones mortis: torrentes Belial terruerunt me.
Funes inferni circumdederunt me: praevenerunt me laquei mortis. (Sheol h7585)
7 in tribulatione mea invocabo Dominum et ad Deum meum clamabo et exaudiet de templo suo vocem meam et clamor meus veniet ad aures eius
In tribulatione mea invocabo Dominum, et ad Deum meum clamabo: et exaudiet de templo sancto suo vocem meam, et clamor meus veniet ad aures eius.
8 commota est et contremuit terra fundamenta montium concussa sunt et conquassata quoniam iratus est
Commota est et contremuit terra: fundamenta montium concussa sunt, et conquassata, quoniam iratus est eis.
9 ascendit fumus de naribus eius et ignis de ore eius voravit carbones incensi sunt ab eo
Ascendit fumus de naribus eius, et ignis de ore eius vorabit: carbones succensi sunt ab eo.
10 et inclinavit caelos et descendit et caligo sub pedibus eius
Inclinavit caelos, et descendit: et caligo sub pedibus eius.
11 et ascendit super cherubin et volavit et lapsus est super pinnas venti
Et ascendit super cherubim, et volavit: et lapsus est super pennas venti.
12 posuit tenebras in circuitu suo latibulum cribrans aquas de nubibus caelorum
Posuit tenebras in circuitu suo latibulum: cribrans aquas de nubibus caelorum.
13 prae fulgore in conspectu eius succensi sunt carbones ignis
Prae fulgore in conspectu eius, succensi sunt carbones ignis.
14 tonabit de caelis Dominus et Excelsus dabit vocem suam
Tonabit de caelo Dominus: et excelsus dabit vocem suam.
15 misit sagittas et dissipavit eos fulgur et consumpsit eos
Misit sagittas et dissipavit eos: fulgur, et consumpsit eos.
16 et apparuerunt effusiones maris et revelata sunt fundamenta orbis ab increpatione Domini ab inspiratione spiritus furoris eius
Et apparuerunt effusiones maris, et revelata sunt fundamenta orbis ab increpatione Domini, ab inspiratione spiritus furoris eius.
17 misit de excelso et adsumpsit me extraxit me de aquis multis
Misit de coelo, et assumpsit me: et extraxit me de aquis multis.
18 liberavit me ab inimico meo potentissimo ab his qui oderant me quoniam robustiores me erant
Liberavit me ab inimico meo potentissimo, et ab his qui oderant me: quoniam robustiores me erant.
19 praevenit me in die adflictionis meae et factus est Dominus firmamentum meum
Praevenit me in die afflictionis meae, et factus est Dominus firmamentum meum.
20 et eduxit me in latitudinem liberavit me quia placuit ei
Et eduxit me in latitudinem: liberavit me, quia complacui ei.
21 retribuet mihi Dominus secundum iustitiam meam et secundum munditiam manuum mearum reddet mihi
Retribuet mihi Dominus secundum iustitiam meam: et secundum munditiam manuum mearum reddet mihi.
22 quia custodivi vias Domini et non egi impie a Deo meo
Quia custodivi vias Domini, et non egi impie, a Deo meo.
23 omnia enim iudicia eius in conspectu meo et praecepta eius non amovi a me
Omnia enim iudicia eius in conspectu meo: et praecepta eius non amovi a me.
24 et ero perfectus cum eo et custodiam me ab iniquitate mea
Et ero perfectus cum eo: et custodiam me ab iniquitate mea.
25 et restituet Dominus mihi secundum iustitiam meam et secundum munditiam manuum mearum in conspectu oculorum suorum
Et restituet mihi Dominus secundum iustitiam meam: et secundum munditiam manuum mearum, in conspectu oculorum suorum.
26 cum sancto sanctus eris et cum robusto perfectus
Cum sancto sanctus eris: et cum robusto perfectus.
27 cum electo electus eris et cum perverso perverteris
Cum electo electus eris: et cum perverso perverteris.
28 et populum pauperem salvum facies oculisque tuis excelsos humiliabis
Et populum pauperem salvum facies: oculisque tuis excelsos humiliabis.
29 quia tu lucerna mea Domine et Domine inluminabis tenebras meas
Quia tu lucerna mea Domine: et tu Domine illuminabis tenebras meas.
30 in te enim curram accinctus in Deo meo transiliam murum
In te enim curram accinctus: in Deo meo transiliam murum.
31 Deus inmaculata via eius eloquium Domini igne examinatum scutum est omnium sperantium in se
Deus, immaculata via eius, eloquium Domini igne examinatum: scutum est omnium sperantium in se.
32 quis est deus praeter Dominum et quis fortis praeter Deum nostrum
Quis est Deus praeter Dominum: et quis fortis praeter Deum nostrum?
33 Deus qui accingit me fortitudine et conplanavit perfectam viam meam
Deus qui accinxit me fortitudine: et complanavit perfectam viam meam.
34 coaequans pedes meos cervis et super excelsa mea statuens me
Coaequans pedes meos cervis, et super excelsa mea statuens me.
35 docens manus meas ad proelium et conponens quasi arcum aereum brachia mea
Docens manus meas ad praelium, et componens quasi arcum aereum brachia mea.
36 dedisti mihi clypeum salutis tuae et mansuetudo mea multiplicavit me
Dedisti mihi clypeum salutis tuae: et mansuetudo mea multiplicavit me.
37 dilatabis gressus meos subtus me et non deficient tali mei
Dilatabis gressus meos subtus me: et non deficient tali mei.
38 persequar inimicos meos et conteram et non revertar donec consumam eos
Persequar inimicos meos, et conteram: et non convertar donec consumam eos.
39 consumam eos et confringam ut non consurgant cadent sub pedibus meis
Consumam eos et confringam, ut non consurgant: cadent sub pedibus meis.
40 accinxisti me fortitudine ad proelium incurvabis resistentes mihi sub me
Accinxisti me fortitudine ad praelium: incurvasti resistentes mihi subtus me.
41 inimicos meos dedisti mihi dorsum odientes me et disperdam eos
Inimicos meos dedisti mihi dorsum: odientes me, et disperdam eos.
42 clamabunt et non erit qui salvet ad Dominum et non exaudiet eos
Clamabunt, et non erit qui salvet, ad Dominum, et non exaudiet eos.
43 delebo eos ut pulverem terrae quasi lutum platearum comminuam eos atque conpingam
Delebo eos ut pulverem terrae: quasi lutum platearum comminuam eos atque confringam.
44 salvabis me a contradictionibus populi mei custodies in caput gentium populus quem ignoro serviet mihi
Salvabis me a contradictionibus populi mei: custodies me in caput Gentium: populus, quem ignoro, serviet mihi.
45 filii alieni resistent mihi auditu auris oboedient mihi
Filii alieni resistent mihi, auditu auris obedient mihi.
46 filii alieni defluxerunt et contrahentur in angustiis suis
Filii alieni defluxerunt, et contrahentur in angustiis suis.
47 vivit Dominus et benedictus Deus meus et exaltabitur Deus fortis salutis meae
Vivit Dominus, et benedictus Deus meus: et exaltabitur Deus fortis salutis meae.
48 Deus qui das vindictas mihi et deicis populos sub me
Deus qui das vindictas mihi, et deiicis populos sub me.
49 qui educis me ab inimicis meis et a resistentibus mihi elevas me a viro iniquo liberabis me
Qui educis me ab inimicis meis, et a resistentibus mihi elevas me: a viro iniquo liberabis me:
50 propterea confitebor tibi Domine in gentibus et nomini tuo cantabo
Propterea confitebor tibi Domine in gentibus: et nomini tuo cantabo.
51 magnificanti salutes regis sui et facienti misericordiam christo suo David et semini eius in sempiternum
Magnificans salutes regis sui, et faciens misericordiam christo suo David, et semini eius in sempiternum.
